«Glaziarraz haratago» hau Kirgizistanen eta Kazakhstanen filmatutako dokumental bat dugu. Asia Erdialdean urarekin dagoen gatazka du hizpide, eta Sir Daria ibaiaren bilakaera konplexua aztertzen du: ibaia Tian Shan mendilerroko glaziarretan jaiotzen da eta Aral itsaso galduan itsasoratzen da, 3.000 kilometroko bidea egin ondoren. Kasua aztertu duten adituak eta uretatik bizi diren pertsonak, gehienak arrantzaleak, lekukotzat hartuta, dokumentalak gogoeta egiten du gizakiak ingurune naturalarekin dituen harremanen inguruan, eta gure espezieak kaos geografikoko testuinguru batean izan dezakeen etorkizuna aztertzen du.