Azken 15 urteetan, munduan ekoizten den arropa-kantitatea halako bi handitu da, «moda azkarraren» fenomenoaren ondorioz; izan ere, moda horrek ekoizpen-eredu masibo eta esplotatzaile bat sorrarazten du. Guatemalan, El Salvadorren eta Nikaraguan, 260.000 emakumek 12 ordura arteko lanaldi nekagarriak dituzte, egunean 7 € baino gutxiago kobratuta. Dokumentalak Erdialdeko Amerikako eta Valentziar Erkidegoko ehungintzako langileen lekukotasuna biltzen du. Sistema horren barruan gaude denok, nahi eta nahi ez, eta dokumentalak gakoak ematen dizkigu, barrutik uler dezagun sistema horrek nola funtzionatzen duen, batetik, eta, beste batetik, ohartu gaitezen janztea ekintza politikoa ere badela, justizia-ekintza eta etorkizunerako ekintza ere badela.